వికటకవి

జీవితంలో కొన్ని సార్లు కొన్ని ఘోరాలు చేస్తుంటాము. అలాంటి ఓ పని చేసి తల బొప్పి కట్టించుకున్నా. బొప్పి కట్టించిన ఆ ఘోరం ‘జల్సా’.

ఇదేదో వెక్కిరింపుగానో లేదా వేళాకోళానికో అడగట్లేదు. ఈ సినిమా చూసి ఎంతో కొంత నచ్చింది అనుకునే వాళ్ళెవరికైనా ‘ మంచి ‘  సత్తా ఉన్న సన్నివేశాలు (సినిమా పక్కనపెట్టండి) ఒక్క మూడంటే మూడు ఉంటే చెప్పండి.

దయచేసి సినిమా సినిమాలా చూడాలి అనకండీ. నేను సినిమాని పక్కా సినిమాగానే చూశా. ఇంకా చెప్పాలంటే సినిమాని సినిమాగా కన్నా ఇంకా నీచంగానే(గ్రేసు మార్కులిచ్చుకుంటూ) చూశా. త్రివిక్రం ఇలా కూడా తీయగలడా అనిపించింది.

నాకేమి నచ్చలేదో అని రాసే కంటే నాకు నచ్చినవి అని రాస్తే పని సులువవుతుంది అనిపించింది.  అదల్లా మహేష్ బాబు గొంతు. అంటే మహేష్ బాబుది అంత గొప్ప గొంతా అని అడగొద్దు. ఈ సినిమాలో ఇదొక్కటే నచ్చింది నాకు

ఇది కాక మరో మూడేవైనా నచ్చితే చెప్పండి. నా బాధల్లా నేనొక్కణ్ణే ఈ జాబితాలోనా లేక నాకు తోడు ఉన్నారా అని తెలుసుకుందామనే.

ఈ మధ్య ఓ అమ్మడు నాకు కాఫీ కలిపేవాడు, అంట్లుతోమేవాడు మొగుడుగా కావాలి అంటూ పాడుతూ తెగ ఊదరగొడ్తోంది. షరతుల పెళ్ళికొడుకుల తర్వాత షరతుల ఆడపిల్లల్ని వెతుకుతున్నానేమో, ఈ అమ్మడి బాధేంటో చూద్దామని ఆ పాట సాహిత్యాన్ని ఓ చూపు చూశా. అంతే, ఆ సాహిత్యపు విలువలకి దిమ్మ పూర్తిగా తిరిగి కళ్ళు బైర్లు కమ్మాయి.

ఈ మధ్యే మన రాకేశ్వరుడు నవతరంగంలో సినిమాల హీనస్థితి గూర్చి రాశారు. ఇది దిగజారుతున్న సినీ సాహిత్యానికి మరో ఉదాహరణ. ఏమాటకామాటే, రాసిన చంద్రబోసు గారు చాలా మంచి పాటలు అందించారు గతంలో. పోనీ డబ్బింగు సినిమానా అంటే అదీ కాదే. ఇలా రాసేంత క్లిష్టపరిస్థితులేమిటో మరి…

ఇక పాట విషయానికొస్తే,

అమ్మడికి కాఫీ కలిపి, కంచం కడిగి, వెనక నక్కుతూ ముందు మొక్కుతూ ఉండే వాడు కావాలిట… అంటే ఉత్త చవట, వెన్నెముక లేనివాడు అనేగా. అబ్బాయికి బైకెక్కి, బ్యాకు నొక్కి, చితక్కొట్టుడు కొట్టని, బట్టలు ఇస్త్రీ చేసేది కావాలిట. ఇదీ సాహిత్యం వరస. ఇంకా నన్ను బాగా హింసించిన వాక్యాలివి.

తాగూ ఊరేగు అది మగలక్షణమని చెప్పే లేడీ కావాలి (ఇది హీరోగారి పలుకండోయ్)
నా అప్పు తానే తీర్చాలి (పూర్తిగా సిగ్గుశరం వదిలేశాడు..వీడి అప్పు తీర్చే అమ్మాయి కావాలా, ఇదెక్కడి డ్యూయెట్టురా దేవుడా). ఉదయాన్నే అయిదింటికొస్తే తలుపు తియ్యాల్ట. (మా ఇళ్ళల్లో తలుపు తీస్తారు గానీ, అలా రోజూ వస్తే మొహాన పేడనీళ్ళు చల్లుతారు బాబూ.)

ఈ లెక్కన సినిమాకి పాట రాయలేనిదెవడు? చూస్తూ, వింటూ ఆనందించండి దిగజారిన మన సినీ సాహిత్యాన్ని.

****************************************

ఎవడు ఎవడు ఎవడు ఎవడు ఎవడు ఎవడు
ఎవడు ఎవడు ఎవడు ఎవడు ఎవడు ఎవడు

నా కాఫీ  కలిపేవాడు నా కంచం కడిగేవాడు
నా కష్టం తీర్చేవాడు నాక్కావాలి

నా కూడా వుండేదీ నా డ్రెస్సే పిండేదీ
నన్నే ఇస్త్రీ చెయ్యనిది నాక్కావాలి

నా చేత చిక్కేవాడు నా వెనక నక్కేవాడు
నా ముందు మొక్కేవాడు నాక్కావాలి

నా బైకే ఎక్కేదీ నా బ్యాకే నొక్కేదీ
నన్నొదిలి చెక్కెయ్యనిది నాక్కావాలి

సరి అయిన మొగుడు ఎవ్వడు
సుగుణాల మగువ ఎవ్వరు
ఎన్నో అందించేవాడు ఎదురేదీ అడగనివాడు
ఏటీయెం అయ్యేవాడు ఎవడు ఎవ్వడు ఎవడు ఎవ్వడు
ఎవడు ఎవడు హేయ్….

మందూ సిగరెట్టూ చెడు అలవాటంటూ వుండని వాడే కావాలి
తాగూ ఊరేగు అది మగలక్షణమని చెప్పే లేడీ కావాలి
అమ్మాయీ,ఆంటీస్ అసలెవ్వరివంక చూడని వాడే కావాలి
చూడు తెగ చూడు అందరిలో నన్నే చూడమని తను పలకాలి
ఎంతందంగా వున్నావంటూ పొగడాలి
నిజాలు చెబితే నమ్మాలి
ఎంతో ఎంతో ఖర్చే పెట్టి తిప్పాలి
నా అప్పు తానే తీర్చాలి
ఏమైనా చేసేవాడు ఏమన్నా నమ్మేవాడు
పాతికేళ్ళ పసివాడు ఎవడు ఎవడు ఎవడు ఎవడు
ఎవడు ఎవడు హేయ్….

పెళ్ళే అయ్యాక ఇక లవ్వో గివ్వో ఆడే వాడే కావాలి
లవ్వే చేసాక ఇక పెళ్ళి గిళ్ళి ఆడే లేడీ కావాలి
ఆరు మరి యేడు సాయంత్రం లోగా ఇంటికి తానే రావాలి
ఐదు గంటలకే ఉదయాన్నే వస్తే తలుపే తాను తీయాలి
అందరికన్నా నన్నే మిన్నగా చూడాలి
నా వాళ్ళు నాకు కావాలి
జోకులు చెప్పి నవ్విస్తూనే ఉండాలి
కన్నీళ్ళు కూడా కలగాలి
ఆ నా ప్రశ్నకు బదులైనోడు నా మనసుకు మ్యాచ్ అయినోడు
నా సొగసుకు సూట్ అయినోడు ఎవడు ఎవడు ఎవడు ఎవడు
ఎవడు ఎవడు హేయ్….

నా కోసం పుట్టే వాడు నా కోసం బ్రతికే వాడు
నా కోసం చచ్చే వాడు ఎవడు..
************************************

మళ్ళీ నాగార్జునా యూనివర్సిటీ వారు డాక్టరేట్లు ప్రకటించారండీ. ఓ ఇద్దరి పేర్లు చూశాక జీర్ణించుకోవటం కష్టం అయింది. 

కోనేరు రంగారావు (మంత్రివర్యులు) - గౌరవ డాక్టరేట్
డాక్టర్ నాయుడమ్మ (నిజం డాక్టరు) - గౌరవ డాక్టరేట్

ఒకరిది వారసులకు గ్యాసు డీలరు షిప్పు కోసం ఇతరుల్ని బెదిరించి సాధించుకున్న అపకీర్తి. మరొకరిది, అవిభక్త కవలల్ని దేశీయ సౌకర్యాలతో విదేశీ స్థాయిలో వైద్యం అందించి వేరుచేయగలిగే ఘనకీర్తి. ఇద్దరికీ నక్కకీ, నాగలోకానికీ ఉన్నంత తేడా ఉంది అని వేరే చెప్పనవసరం లేదు.

మరి నాగార్జున యూనివర్సిటీ వారి ఈ గొప్పతనం వల్ల కోనేరు రంగారావు గారి విలువ పెరిగిందా లేక డాక్టర్ నాయుడమ్మ గారి విలువ తగ్గిందో తెలియట్లా? లేక మొత్తానికే ఈ గౌరవ డాక్టరేట్ విలువ తగ్గి అగౌరవ డాక్టరేట్ అయ్యిందా.

గత కొన్ని నెలలుగా ఈ యూనివర్సిటీల డాక్టరేట్ల వ్యవహారాన్ని గమనిస్తుంటే, డబ్బులకి దొంగ సర్టిఫికేట్లు అమ్ముకునే వాళ్ళకి మల్లే ప్రవర్తిస్తున్నట్లుంది.

అయినా నాకర్ధం గాదు, రాజకీయనాకులకి ఈ గౌరవ డాక్టరేట్ల పిచ్చెందుకు? డబ్బు దోచుకోటం అయిపోయింది, ఇహ కీర్తి మీద పడ్డారంటారా?